په کابل کی د خان عبدالغفارخان د٢٠ تلين دنمانځنې په مناسبت سيمينار جوړ شو
January 20, 2009 – 12:23 amعبدالقدير صديقي – May 19, 2008 – 09:18
کابل
د غويي ٣٠مه، پژواک خبري اژانس
د لرې او برې پښتونخوا د خدايي خدمتګار د تحريک د باني خداى بخښلي خان عبدالغفار خان د ٢٠ تلين د نمانځنې په مناسبت درې ورځنى سيمينار په کابل کې پرانېستل شو .
په دغه سيمينار کې، چې د غويي په ٣٠ مه، د افغانستان دعلومو اکاډمۍ او دسيمه ييزو مطالعاتو د مرکز لخوا پرانېستل شو، د هېواد دکابينې او پارلمان غړيو ، له هندوستان او پاکستان څخه يوشمېر راغليو مېلمنو او په سلګونو استادانو ، شاعرانو او فرهنګيانو ګډون کړى وو .
د خدايي خدمتګار تحريک مشر خان عبدالغفارخان، چې په باچاخان مشهور دى، په ١٨٩٠ ميلادي کال کې دکوزې پښتونخوا (سرحد ايالت) د چارسدې په اشنغرکې زېږېدلى او په ١٩٨٨ ميلادي کال کې يې له نړۍ څخه سترګې پټې کړې دي .
د نوموړي مړى دهغه له وصيت سره سم دننګرهار ولايت په جلال اباد ښار کې خاورو ته وسپارل شو او همدلته يې مزار دى .
غونډې ته د جمهوري رياست دويم مرستيال محمد کريم خليلي په خپلو وينا کې د خان عبدالغفار خان مړينه يوه ستره ضايعه وبلله او زياته يې کړه چې باچاخان په ډيرو خرابو سياسي حالاتو کې ګټور تصاميم نيولي دي .
دخليلي په وينا ، باچاخان نه يواځې دپښتنو لپاره د آزادۍ په لټه کې وو، بلکې هغه دسيمې دهېوادونو په کچه د آزادۍ لپاره مبارزه کوله .
نوموړي زياته کړه چې دغه ډول غونډې د هېواد دڅېړونکيو لپاره د دې لار برابروي، چې د هېواد راتلونکيو نسلونو ته دتاريخ په ډول يوڅه ترې پاتې شي .
دغه راز په نننۍ غونډه کې د پاکستان له سوبه سرحد ايالت څخه راغلي مېلمه او قومي مشر افضل خان لالا هم دباچاخان په کارنامو رڼا واچوله او ويې ويل : (( باچاخان هغه ستر مبارز شخصيت و، چې دخپل عمر زياته برخه يې خلکو ته د خدمت په لار کې تېر کړې ده .))
په غونډه کې داطلاعاتو او کولتور ، دسرحداتو او قبايلو وزارتونو او دکابل پوهنتون پيغامونه هم ولوستل شول .
د اطلاعاتو اوکولتور وزارت مالي او اداري مرستيال غلام نبي فراهي ديادشوي وزارت پيغام په لوستلو سره وويل چې د باچاخان مبازره يواځې پښتنو پورې محدود نه وه ، بلکې ډېرو محکومو ملتونو ترې درس اخيستى دى .
فراهي دافغانستان اوسني حالت ته په اشارې سره ، زياته کړه چې په دې يوويشتمې پېړۍ کې د هېواد روانو ستونزو د حل لپاره هماغسې يو مثال ته اړتيا ده .
د غونډې په پاى کې د افغانستان دسيمه ييزو مطالعاتو مرکز مشر عبدالغفور لېوال وويل چې د باچاخان دژوندانه په اړه علمي بحثونه به سبا او بله ورځ ترسره شي .