|
نن د ۲۰۱۰ کال د فبرورۍ په لومړۍ نېټه د افغان ځوانانو ټولنې دویمه کاري غونډه د لندن د لویدیځ اکټن په سیمه کې د افغان سوسایټي په ودانۍ کې جوړه شوه. غونډه د محترم شعیب له مرۍ نه د قران شریف د سپېڅلو آیتونو په تلاوت سره پیل شوه. د غونډې په سر کې ښاغلي محمود حنیف د پیل خبرې وکړې او د افغان ځوانانو د ټولنې د پرانستلو په ارزښت او موخو باندې یې رڼا واچوله. ښاغلي حنیف وویل چې دا ټولنه د کوم سیاسي او اړخي اغېزې نه پرته یوازې او یوازې د افغان ځوانانو سره د هر اړخیزو ښونیزو علمي او مالي مرستو د رسولو په موخه جوړه شوې ده. حنیف د ټولنې د راتلونکي کال د کارونو او لاس لاندې مرستندویو پروژو په اړه مفصلې خبرې وکړې. د خبرو په پای کې د ټولنې مشرتابه جرګه ګۍ داسې راوپېژندله:
مشر: ډاکټر خسرو سنګروال
مرستیال مشر او د پروژو د ودې او انسجام مدیر: محمود حنیف
د آمیانۍ مشر (مالي مشر): سلیمان زهیر
سکرتر: ځغرد تکل
د مطبوعاتي چارو مشر: ذبیح ځاځی
د برېښنایي رسنیو د چارو سمبالونکی: شعیب خان
د ښاغلي حنیف د خبرو نه وروسته ډاکټر خسرو سنګروال د دې ټولنې د جوړېدو په اړتیا وغږېد او هغه توکي یې په ګوته کړل چې نورو ټولنو ورته پاملرنه نه ده کړې. نوموړي هم د راتلونکي کال لپاره ټاکل شوو موخو باندې نور وغږېد. ورپسې د مسلم هېنډ نړیوالې مرستندوې ادارې استازی عرفان خان د خپلې وینا په ترڅ کې د ټولنې په حقوقي اړخونو رڼا واچوله. سلیمان زهیر او شعیب خان هم د خپلو خبرو په ترڅ کې د ټولنې د هوډ پخلی وکړ او ښاغلي ذبیح ځاځي بیا هېواد کې دننه د ترسره کېدونکو پروژو په شوونتیا وغږېد. ښاغلي عارف د ټولنې خبرتیایي چارو په پیاوړي کولو زور واچوه.
د غونډې په ترڅ کې د آمیانۍ مشر سلیمان زهیر څرګنده کړه چې د راتلونکې پروژې لپاره د په پام کې نیول شوې بودیجې په سلو کې (۲۰٪) تیاره شوې ده چې یوه غټه لاسته راوړنه ده.
غونډه ښاغلي ځاځي او ښاغلي حکمت ته دنده وسپارله چې ټولنې ته د بودیجې پیدا کولو او لویولو کې کار وکړي. ښاغلي عارف او ښاغلي شعیب ته د نورو رسمي او غیر رسمي افغاني موسسو سره د خپلوي پیدا کولو کار ور په غاړه شو. غونډه سلا شوه چې ټولنه به د خپلې بلې ناستې په درشل کې د یو تفریحي پروګرام تابیا کوي او له دې پروګرام نه به د خلکو د خبرولو او د ټولنې لپاره د بودیجې د پیدا کولو استفاده کوي.
د ټولنې راتلونکې ناستې ته به ښاغلی ځغرد تکل یو معلوماتي پرزېنټېشن کوي.
ننۍ ناسته په ګډه دوعا پای ته ورسېده.
|
.jpg)
