ليکنه : محمد يوسف خدمتګار مزدورزوې

خپروونکی : د لراوبر اداره

نېټه : ١٨ / ١١ / ١٣٨٨  |  2010-02-07

larawbar.com

 پسرلي ته پيغام

تا چې پسرليه له تيارو نه رڼا جوړه کړه
چاته دې دا ښکلې د ګلونو دنيا جوړه کړه
دلته نه توتيان او بلبلان ټول شړل شوي دي
دلته نغمې نشته ټولې ژبې ګنډل شوې دي
دلته تنکۍ څانګې د ګل ونې سيځل شوې دي
دلته ساندې اوښکې دي تا څنګه خندا جوړه کړه
چا ته دې دا ښکلې د ګلونو دنيا جوړه کړه
دلته ژوند ارمان دی ټول رنګونه سوځيدلي دي
دلته د خندا مينې نومونه سوځيدلي دي
دلته مستي نشته اميدونه سوځيدلي دي
تا زمونږ د ژوند پورې د مکر موسکا جوړه کړه
چاته دې دا ښکلې د ګلونو دنيا جوړه کړه

ستا نسيم هم سوی دی اسمان ته اشارې کوي
الوځي توديږي او سوځيږي چې ښيرې کوي
ستا د رنګ او حسن کيسه څه ته مسخرې کوي
تا د چاله خوب نه د نازونو ليلا جوړه کړه
چاته دې دا ښکلې د ګلونو دنيا جوړه کړه
يو څل ورته وګوره چې کونډې يتيمان سوځي
شاو خوا د حق او تنکۍ مينې شهيدان سوځي
ښکلي شا زلمي مو د بل کار کې په ارمان سوځي
ستا، سوو، غاټولو، ته کډوالو ژړا جوړه کړه
چاته دې دا ښکلې د ګلونو دنيا جوړه کړه
دلته که راځې نو پسرليه اتفاق راوړه
مونږ ته د يووالي محبت ښکلي اخلاق راوړه
واخله داوسلې له مونږ ژوند ته اشتياق راوړه
دا زمونږ پيغام دی مونږ ته داسې رڼا جوړه ګړه
چاته دې دا ښکلې د ګلونو دنيا جوړه کړه

مونږ نه پردو لاسونه لنډ کړه زمونږ کور جوړ کړه
زمونږ زړونه رڼا په علم فن کړه زمونږ کور جوړ کړه
مونږ ته د پلرو غيرت څرګند کړه زمونږ کور جوړ کړه
غواړي خدمتګار له تانه بيا اريانا جوړ کړه
چاته دې دا ښکلې د ګلونو دنيا جوړه کړه

 محمد يوسف خدمتګار مزدورزوې

شاته