پكتيكا كې د هر ښوونځي په سر يو مسلكي ښوونكى هم نشته
January 5, 2010 – 8:53 amعبيد خروټى - ښرنه
د پکتيکا ولايت د پوهنې رياست چارواکي د مسلکي ښوونکيو له کموالي سر ټکوي او وايي چې دا مهال د هر ښوونځي په سر يو مسلکي ښوونکى هم نلري .
ددې ولايت د پوهنې سرپرست رييس محمد ياسين همت د مرغومي په ٩مه، له پژواک خبري اژانس سره په يوه مرکه کې وويل چې اوسمهال په دې ولايت کې ٣٢٣ ښوونځي فعال دي . د نوموړي په وينا، په دې ښوونځيو کې يې ٣٣ لېسې، ٣٧ منځني او ٢٥٣ يې لومړني ښوونځي دي ، چې پکې څه دپاسه ١٢٤ زره زده کوونکي پر زده کړو بوخت دي . هغه زياته کړه چې په دې زده کوونکيو کې يې نږدې شل زره نجونې او پاتې نور يې هلکان دي .
همت وايي چې دغه زده کوونکي د ٣٣٣٦ تنو ښوونکيو لخوا روزل کېږي، چې په دې ډله کې يواځې ٣٥٠ تنه ښوونکي رسمي او ځينې يې مسلکي دي . د پوهنې سرپرست رييس د مسلکي او رسمي ښوونکيو د کموالي د ستونزو ترڅنګ د ښوونځيو د ودانيو له لږوالي هم سر وټکاوه . د هغه په وينا، له ٣٢٣ څخه يې يواځې ٩٦ ودانۍ لري ، پر ٣٠ نورو کار روان دى او پاتې نور يې ودانۍ نه لري .
همت دا هم وويل چې د روان لمريز کال په اوږدو کې د نا امنيو له امله او د طالبانو تر واک لاندې سيمو کې ٤٦ ښوونځي تړل شوي دي . هغه زياته کړه : (( په راتلونکي کال کې به هڅه وکړو، چې دسيمو د قومي مشرانو په هلو ځلو تړل شوي ښوونځي بېرته پرانيزو.)) نوموړى وايي چې د مسلکي ښوونکيو د کموالي ستونزه هغه مهال هوارېداى شي، چې د ولايت په مرکز ښرنې ښار کې يو دارالمعلمين جوړ شي .
بل لوري ته ددې ولايت قومي مشران او زده کوونکي هم د مسلکي ښوونکيو او د ښوونحيو د ودانيو له کموالي څخه شکايت کوي .
د ښرنې اړونده د علي بابا لېسې د دولسم ټولګي يو تن زده کوونکى شېرمحمد وايي چې په لېسه کې يواځې څلور مسلکي ښوونکي لري . هغه پژواک ته وويل: (( د مسلکي ښوونکيو د کموالي له امله د پکتيکا زده کوونکي د کانکور په ازموينه کې د لوړو زده کړو موسسو ته نه بريالي کېږي .))
ددغې لېسې د والدينو د شورا مشر حاجي عبدالعزيز هم د مسلکي ښوونکيو ستونزه ستره ننګونه ګڼي او زياتوي چې له دې امله يې اولادونه له لوړوزده کړو بې برخې پاتې کېږي . نوموړي هم په دې ولايت کې د يوه عالي دارالمعلمين د جوړولو غوښتنه وکړه .
د يادونې وړ ده، چې ددغه ولايت په ارګون ولسوالۍ کې يو دارالمعلمين شتون لري، خو د ځايي اوسېدونکيو په وينا، دغه دارالمعلمين هم له ګڼو ستونزو سره مخ دى .
د پوهنې وزارت نوماند وزير ډاکټر فاروق وردګ څو ورځې مخکې خپل کاري پلان د ولسي جرګې غونډې ته وړاندې کړ.
هغه که څه هم د مسلکي ښوونکيو د کموالي ستونزه ومنله ، خو ويې ويل چې د پوهنې وزارت د ستراتيژيک پلان له مخې به، تر١٣٩٩ کال پورې د افغانستان يو ماشوم هم ، چې د ښوونځي قانوني عمر يې پوره کړى وي، له ښوونځي څخه بې برخې پاتې نشي .
له پژواك خبري آژانس څخه په مننه